Akademia is ʼn Christelike, klassieke en onafhanklike hoëronderwysinstelling wat verbind is tot die uitnemende opleiding en vorming van studente vanuit en vir Afrikaanse taal- en kultuurgemeenskappe. Akademia het vanaf Januarie 2027 op die Paarl-kampus ʼn deeltydse dosentpos in Wiskunde in die Fakulteit Natuurwetenskappe beskikbaar. Kandidate op vlakke van junior dosent of dosent kan oorweeg word.

Laai asseblief u CV in Afrikaans op as deel van u aansoek.

P O S D O E L S T E L L I N G

ʼn Dosent is daarvoor verantwoordelik om gehalteonderrig aan studente te bied deur innoverende klasaanbiedings en leerervarings. Die pos vereis dat akademiese take, navorsing en innovering asook akademiese gemeenskapdeelname ywerig verrig word. Die vorming van studente tot goedgevormde mense word hoog op prys gestel. ʼn Dosent streef na erkenning as leier op ʼn vakgebied en verdieping in alle klasaanbiedinge.

V E R A N T W O O R D E L I K H E D E

Verantwoordelikhede sluit in, maar is nie tot die volgende beperk nie:

• voorbereiding en dosering van die module-inhoud

• opstel en nasien van assesserings-aktiwiteite vir ʼn kontakleeromgewing

• lewering van bystand en akademiese ondersteuning aan studente

• akademiese administrasie

• betrokkenheid by Akademia in die algemeen

P O S V E R E I S T E S

• ʼn Meestergraad is noodsaaklik vir ʼn dosentpos en ʼn honneursgraad vir ʼn junior dosentpos.

• Die kandidaat moet bereid en bevoeg wees om Diskrete Wiskunde, soos wat dit gebruik word in Wiskunde van Programmering, te doseer.

• Minstens drie jaar ondervinding by ʼn hoëronderwysinstelling word vereis vir ʼn dosentpos en ondervinding as tutor of ander onderrigverwante aktiwiteite vir ʼn junior dosentpos.

V A A R D I G H E D E

• sterk verbale en geskrewe kommunikasievaardighede

• interpersoonlike vaardighede

• prioritiserings- en tydsbestuursvaardighede

• onafhanklik in ʼn spanverband funksioneer

• inisiatief neem en oplossingsgedrewe wees

• vermoë om werk onder druk te voltooi

• ambassadeur vir Akademia (help om die instelling uit te bou)

• liefde vir Afrikaans

Akademia behou die reg voor om nie ʼn aanstelling te maak nie. Akademia is kragtens die Wet op Hoër Onderwys 75 van 1997 by die Departement van Hoër Onderwys en Opleiding geregistreer (registrasienommer: 2011/HE08/005). Akademia is deel van die Solidariteit Beweging.